لماذا

لماذا انا

لماذا انتى

لماذا فى هذا الوقت...... هذا الوقت بالتحديد

....اتيتى لتذكرينى بهذه الأيام و هذه الذكريات الجميله

نعم لازلت احبك.... ليس بيدى حيله

نعم عاجز..... عاجز حتى ان اعبر لك بحبى

نعم اشعر من دونك بالوحده ....... حتى و انا فى وسط الزحام

لا

لا لن ابقى هكذا

لن استطيع ........

فأنا لم اعتاد على الحياه فى هذه الحاله من الضعف

!!حـــــــــاله كده

كل عام و مع اقتراب موعد الأمتحانات تزورننى حاله غريبه من الأحبااط و الأكتئاب الشديد

تسد نفسى عن كل حاجه فى الدنيا.

الائى نفسى أعدت فى البيت و أفلت باب الأوضه عليا ونفضت لكل حاجه ممكن اعملها فى حياتى فيتقلب ليلى نهار ونهارى ليل, و يقل معدل مذاكرتى النص.

يعنى انا تأريباً بألى اسبوع منزلتش من البيت.

هتقولو عشان تذاكر

بس انا مأعدتش على الوحه الأسبوع ده خالص ولا حتى فتحت كتاب

ولا حتى رحت الجامعه اشوف جدول الامتحانات.

كل يوم لما يجى الفجر والعصافير تزقزق ونور الشمس يطلع اقول كده كفايا و ادخل السرير و احاول انام.

ولكن مبعرفش انام, افضل اتألب فى السرير وتبدأ الأفكار فى افشال محاولات نومى

استعيذ بالله من الشيطان الرجيم, و اغمض عينايا واحاول افضى دماغى وابطل تفكير.

وبعد مرور اكتر من ساعه من العزاب أخيراً اروح فى النوم.

واصحى تانى يوم كأنه نفس اليوم القبله.

نفس التفاصيل نفس الفراغ وربضو مفيش مذاكره وبرضو نفس العذاب قبل النوم.

بجد مش عارف ايه الحل؟

بس نفسى اصحى بكره الصبح فى حاله احسن شويه واروح الجامعه و اشوف حالى و مزاكرتى شويه لحسن كده مش هينفع.......

وانا بكتب البوست ده افتكرت قصيده للشاعر الجميل على سلامه

بتوصف الحاله البتحصلى

حبيت اكتبها

حــــاله كده..........

معرفش ليه تنحت للدنيا كده

فجأه لقينى مسكون بالملل

لا عندى رغبه فى البكى

ولا فى الكلام ولا عايز انام

ولا حتى بسأل أيه ده أيه و أخرتها أيه

و أيه العمل

واخاف اقول لأى حد

لحسن يقوم يقلبها جد

حد صحبى ينزعج....

يمد ايده جوه قلبه من باب الكرم

عشان يشاركنى الألم

او يستلفلى من لئيم حبه امل

حاله كده معرفش ليه

لا معاها ينفع كلمتين ولا غنوتين

ولا لقطه من البوم صور

ولائى قلبى فى الهوا ويا الكور

واخاف اقول لأى حد

احسن يقوم يقلبها جد

حاله كده معرفش ليه

حاله كده ملهاش معاد

سعات تزرنى فى الربيع

فى الحر و فغز الشتا

وتجيب حاجات لا فيها روح ولا ميته

لاكنى برجع منها بعد السكات

فاهم شويه فى اللى فات

حاسس اوى بحضن الصحاب

محظوظ انا.......

سعات بشاور ينفتحلى الف باب

لاكنى بغلط فى الحساب

و معرفش لـــــيه

معرفش ليه؟

!ازاى يحصل كده

!!!لما شفت الأعلان ده جالى حاله ذهول
هتقولو اعلان ايه... هقول اعلان الأسطوره
هـتسئلونى ايه هو المنتج ده.... هقول فياجرا مصرى
المشكله مش فى المنتج... ولكن المشكله فى محتوى اعلانه؛ علماً بانه يذاع فى التلفزيون المصرى... فمحتواه سيىء جداً لأنه يعطى معلومات اكتر من الازم
تعالو مثلاً نقارن الأعلان ده بالأعلان بتاع شركه فايزر..... علماً بأن شركه فايزر هى اول شركه منتجه لهذا الدواء فى العالم

* اعلان ِشركه فايزر يأخذ بمنطق "خير الكلام ما قل و دل" علما بأنه موجه الى الشرق الأوسط
* اما اعلان الأسطوره بتعنا فيقوم بشرح فوائد المنتج بالتفصيل الممل مع استخدام وسائل توضيحيه و شرح صوتى كمان

انا مش عارف اقارن اكتر من كده.... اتفرجو انتو و قارنو بنفسكم

الأعلان المصرى

اعلان شركه فايزر

هل نحن نفتقر نفتقر للأبداع لدرجه اننا مش عارفين نعمل اعلان موجه يستهدف مستهلك المنتج؟
طيب ازاى الرقابه سمحت ببث الأعلان المستفز ده فى التلفزيون المصرى؟ علماً بأنه سوف يشاهد من جميع الفئات السنيه
واننا مش فى أوروبا ولا فى امريكا ولا فى دوله من دول العالم الأول بتعهم ده
احنا فى دوله اسلاميه ولينا عادتنا وتقاليدنا.... ولا ايه؟؟

حتى الأن انا مذهول ...... وخايف اصحا فى يوم الائى الأفلام الثقافيه أياها بتتذاع على التلفزيون المصرى اللى بيخش كل بيت فى مصر

يا ريت حد يجاوبنى على الأسئله اللى انا سألتها فى التدوينه دى عشان انا بجد مش لائى ليهم اجابه
و شكراً

يبقى انت اكيد فى مصر

O TV يبقى انت اكيد فى مصر ...... دا اسم برنامج جديد بيتذاع على قناة
وبيقدمه مذيع اول مره اشوفه اسمه محمد ناصر
البرنامج ده بيناقش المشاكل الموجوده فى مصر والى بنعشها ونواجها كل يوم فى حيتنا اليوميهه
بس بينائشها بطريقه من التهكم و السخريه من غير ميتفلسف فى طرق حلها وفى أخر البرنامج بيعملو لقائات مع ناس عاديه من الشارع ويطرحو عليهم السؤال الى اجابته تحل المشكله
واتفرج بئه يا معلم على سطحية و سذاجة المواطن المصرى فى عدم فهم الأسئله وهيافه الأجابات
يعنى من الأخر اتفرج واضحك للصبح وزى ما بيؤلو "شر البليه ما يضحك" و اسبكو بئه تضحكو شويه

عمود النور

الصحه العقليه

رغيف العيش

منخفض القطاره

السوائه فى شوارع مصر

يعنى مسلن لما الؤال يكون: عمود النور يتبع الحكومه ولا المحليات؟
واحد مش فاهم حاجه و مدفعلو عشان يضحك الناس: يروح فاشخ ضبه وأيل (ولاه هو عمود النور هيفضل عمود نور يعنى )؟
طيب الواحد يحرق دمو عشان بنى ادم مسغبى و مستفز زى ده ليه ... ولا نضحك وخلاص... مش عارف المفروض نعمل ايه..... "مساكين بنضحك مالبلوا ... زى الديوك والرروح حلوه ....... سرأنا فى السكين غلوا"
مش عارف ولله
وارجع تانى وأول "شر البليه ما يضحك" ... و حسبى الله ونعم الوكيل


مجرد توضيح:
انا مقلتش ان كل المصرن أغبيه, بس منئدرش ننكر ان نسبه الغباء و البلاهة بئت كبيره جداً فى البلد.
ولا انا بتريأ على المواطن المصرى الغلبان انا مجرد بنتقده عشان أبل ياخد فلوس فى سبيل انو يطلع فى التلفزيون يؤل كلام عبيط عشان اللى بتفرجو يضحكو عليه فا تزيد نسبه مشاهده البرنامج.
انا مجرد بطرح افكارى.
يمكن نلائى حل.

حيرتى بعد مرو شهر على أعتقالك

بعد ما فات تلاتين يوم على حبسك يا عبد المنعم مبأتش عارف ايه ممكن يحصل لنا تانى؟؟

بمعنى أصح أيه اخرت البيحصل ده؟ هل هذه هى نهايه كل صاحب رأى معارض فى البلد دى؟ طيب اذا كانت هى دى أخرتها! ايه العمل؟

هل هينتهى الأمر بينا كلنا فى السجون و المعتقلات؟؟؟

.... مش ده طبعان اللي بيتمناه اى حد فينا

لأن بالمنظر ده البلد دى مش هينصلح حلها ولا بعد الف الف عااام. لو كل من عارض الحكومه والفساد الى فيها كان مصيره الأعتقال. يبأ ازاى هينصلح حال البلد دى؟؟

أعدت مكتئب فتره طويله من كتر تفكيرى فى السؤال ده. لحد ما فى يوم كنت أعد مع صديقى و اخويا الكبيرادهم السعيد وسألته السؤال ده: ازاى ينصلح حال البلد دى فى ظل القهر السياسى اللى احنا عايشين فيه ؟؟

وقد كان جوابه بأغنيه لمطربه فلسطينيه بنحنبها احنا الأتنين وهى كمليا جبران

وقد كان الجواب كالتالى

وضععو على فمه السلالسل

ربطو يديه فى صخره الموتى

.... وقالو انت قاتل

اخذو طعامه والملابس والبيارق

ورموه فى زنزانة الموتى

.... وقالو انت سارق

طرضوه من كل المرافىء

اخذو حبيبته الصغيره

.... وقالو انت لاجىء

يا دامى العينين والكفين

ان اليل زائل

لغرفه التوقيف باقيه

.... ولا زرد السلاسل

نيرود مات ولم تمت روما

بعينيها تقاتل

بعينيها تقاتل

بعينيها تقاتل

وحبوب سنبله تموت

ستملأ الوادى سنابل

ستملأ الوادى سنابل

ستملأ الوادى سنابل

وكانت هى دى الأجابه الاى بدور عليها. وكنت مستعد جدا لتقبلها وبالفعل اقتنعت بيها

ولكن معرفش ليه كل شويه ارجع اسأل نفسى الؤال ده تانى

ازاى ينصلح حال البلد دى فى ظل هذا القهر الفكرى الرهيب؟؟؟

................ وحتى الأن ابحث عن اجابه لهذا السؤال المحبط

سؤال واحد .... وصبح السؤال مليووووووووووووون

بسم الله الرحمن الرحيم

ابدأ منين

سؤال صعب!! بجد أنا مش عارف ابدأ منين؟
أعدت افكر كتير اكتب إيه فى اول بوست فى البلوج ده
ابدأ منين ..... ابدأ منين
وفجأه أفتكرت اغنيه لفرقه "وسط البلد" اسمها ابدأ منين

ابدأ منين
كل الببان متأفله
ابدأ منين
كل الخطاوى مزلزله
ابدأ منين
و انا الغريب و غريبه فيا الأسئله
والأسئله تبدأ منين
ابدأ منين

وبعدين ألت اعرفكوعن بداية معرفتى بال بلوجينج أو التدوين
كانت بدايتى مع متابعه المدونات عندما بدأ صديقى العزيز يسارى مصرى صاحب مدونه مصر هى امى فى التدوين اى منذ خمس او سته أشهر
فكنت اتابع مدونته بأنتظام وأعطيه رأىّ فى تدويناته ثم عن طريق مدونته بدأت فى متابعه مدونات أخرى مثل مدونة جيمى هوود و مدونة مالك ومدونة وائل عباس ثم فجأه أصبحت المدونات جزء لا يتجزأ من تصفحى للأنترنت

و ها انا اكتب اول بوست على مدونتى والشكر كل الشكر لصديقى العزيز يسارى مصرى الذى وضعنى فى طريق التدوين دون ان يدرى
وأتمنى انى مكنش طولت عليكو